الرئيسيةالبوابةس .و .جبحـثالتسجيلالأعضاءالمجموعاتدخول

شاطر | 
 

 مقتطفات من مذكرات طالبة ثانويه عامه, فتاه مستهتره

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
الــلــــول
Admin
Admin
avatar

المساهمات : 154
تاريخ التسجيل : 30/08/2007
العمر : 30

مُساهمةموضوع: مقتطفات من مذكرات طالبة ثانويه عامه, فتاه مستهتره   الجمعة أغسطس 31, 2007 11:54 am

تعظيم سلام للناس المستهترة-

طالبة في الثانوية العامة .. وما أدراك ما الثانوية العامة.. عارفه ان الكل مر بيها.. بس انا ثانويتها غير.. لا هي حلوة ولا وحشة.. ولا هي سهلة ولا صعبة.. ولا هي آه ولا لاء..
يعني حاجه كده مالهاش معني ولا تحديد.. وبتقول
يعود والدي إلى البيت ليلاً بعد الانتهاء من عمله الشاق.. شايل معاه شيل قد كده.. كلها اكياس تعود لمتجر واحد..
- بابا انت جايب ايه؟
- بنتي حبيبتي اخبار مذاكرتك ايه..ليه كده تقومي من عالمذاكره
- ههه..اصل انت جيت يابابا
- آجيلك لحد عندك بس ابوس ايدك مش تقومي من عالمذاكره
- مهو...اصل.. عادي بقا وريني اشتريت ايه
- جبت كفته وهمبورجر فراخ ولحمه وسمبوسه وعصير تفاح ومنجا وبرتقان و..
- فين الحلويات؟
- مفيش حلويات ايام الامتحان
- اومال انا هااااكل ايه
- اللي شيفاه قدامك ده
- ايه ده ..يع.. ده مش ليا انا
- انتي يا بنت يا مسطولة.. امتى تتعدلي؟؟ انا جايب ده كله لمين يعني؟
- انا رايحه اذاكر
- مش قبل ما تتعشي
- ماليش نفس

وذهبت الى غرفتي..قعتد عالمكتب.. قدامي الكتاب والغرفة هدوء وطراوة..امسك الكتاب بأيدي .. ارفعه لفوق..
سؤال: ما مصدر اليقين عن الغزالي؟؟
والله ما اعرف.. ايه ده.. الـ Mp3 بتاعي اهه..مين لقاه؟؟؟
اشغله.. ايه الاناشيد دي من زماااااااان...طب يلا نسمع بقا..
قفل
البطاريه فارغه..
طلعت بره الوضه.. بابا بابا
- يا نعم
- ابقا اشتريلي بطاريه وانت خارج
- نعم ياختي.؟
- بطاريه
- ليه؟
- عشان الـ Mp3
- ده تبع المذاكره يعني
- هههه :$ حاجه في العلوم
- امشى خلصي مذاكرتك يلا .. بنات آخر زمن
ارجع لتاني مره محبطه..امسك الكتاب للمره العشرين..
سؤال: ما علامات العلم اليقيني.؟
الله يخرب بيت الفلسفه على علم النفس .. ايه اللي دخلني ادبي يعني .. يعني علمي هو اللي همشي فيه !!!..
مممم ايه اخر اخبار المسجات..؟؟؟
صحيح ....بسمه نسيت ابعتلها النهارده ونورة لازم اكلمها وارن على اميرة قبل ما تنام عشان مش تنسى تجيب لي قلم ازرق عشان الامتحان اصل ضيعت بتاعي عقبالكم.. و...
صحيح اختي العزيزة المخطوبة... ياترى فرحها هيكون ازاي.. لا مش متخيلة ابدا فستانها.. وانا هلبس ايه؟؟؟
لازم افصل بس لازم قبل كده اعرف الموديل اللي هفصله..هجيب موديل منين.. كلهم مقرفين مش حاجه بتعجبني.. ما ارسم انا واحد..
خليها بعد ما اكل حاجه تصحصحني..
لسه بفتح اكره الباب...
- على فييييييييييين يا شاطره
- ايه .. بابا؟
- لا اخوه
- ههه.. :$ عمي ازيك؟
- بطلي استعبااااااط انا مش ناقصك
- الله يسامحك يابابا ده انت حتى صعبت عليا قولت اقوم آكل من اللي انت جايبه
- بجد؟
- ايوة اومال هضيع وقتي على حلويات واكل فاضي؟
- انا اعرف؟
- عن اذنك بقا اروح آكل تحب اجيبلك حاجه؟
- كلت كلت.. يلا بس خلصي بسرعه
- يعني آكل لحد ما اشرق
- مش قصدي يعني كلي بسرعه
- مهو بسرعه كده هشرق وبعدين المعده مش هتهضم الاكل السريع ده
- طيب براحه بس متضيعيش وقت ده اللي اقصده
- يعني يا بابا انا بضيع وقت؟
- ايوة
- امتى؟
- دلوقتىىىىىىىىىىىىىىى
- بابا انت اللي بتسأل
- امشي غوري
- اغور؟؟؟؟
- انا مش هرد عليكي انتي اكيد عارفه مصلحتك كويس
- مش هترد ليه يابابا.. مصلحه ايه والكلام الكبير ده
- الله يكرمك ياحبيبتي مش تعذبيني ممكن تروحي ان شاالله تلعبي ..بس سبيني دلوقتي
- ليه هتعمل ايه لوحدك
- ربنا معايا ويصبرني عليكي .. انتي وارثة اللماضه دي منين
- بابا انا كده بضيع الوقت هروح بقا
- مع السلامه ياختي.. انا اللي بقيت اضيع وقتها

عملت بطاطس محمره.. احلى ما فيها انها محمره مش مقلية ... لذذه.. اتفضلوا معايا..
معلش بقا خلصت

رجعت لقيت بابا ماسك الجرنال..
- بابا ايه اخر الاخبار؟
- انك في ثانوية عامه ولازم تذاكري
-تعرف يا بابا؟
- لاء معرفش
- انا ان شاء الله ناوية ادخل طب
- طب؟؟؟؟؟؟؟ طب ايه يا هبلة انتي
- ايه يابابا اتزعرت كده ليه
- انتي يابنتي مش ادبي؟؟؟
- ايوة
- اومال طب ايه
- كنت فاكره ان ده هيرضيك
- اشد في شعري ولا اهبب ايه ياناس
- ايه يابابا مالك؟
- خلاص ادخلي طب
- بجد؟
- ايوة
- بس انا ادبي
- طب انا بهبب بقول ايه من الصبح
- قولت ايه؟
- ولا حاجه
- شوفت بقا.. انا جايه اسألك عن آخر الاخبار اللي مش هتاخد 5 دقايق خليتها ربع ساعه
- انا برضه؟
- ايوة
ترن ترن.. ترن ترن
- انا هرد
- لا يا بابا دي اكيد دينا اللي بتتكسف ترد عليها
- وانتي ايه عرفك انها دينا
- اكيد يعني
- وافرضي لاء؟
- عادي مش هيحصل حاجه .. افرض بقا طلعت دينا
ترن ترن.. ترن ترن
- يابنتي هتضيعي وقتك ايه الاستهتار ده بكره امتحااااااان
- معلش معلش 5 ثواني بس
- لاحول ولا قوة الا بالله
- ايوة يا نورررررة سبحان الله كنت في نيتي اتصل بيكي
الاب:
- اخر استهبال......!!!
- ااااه البنت التخينه اللي شعرها طويل؟؟ اسمها ايه
الاب:
- وكمان غيبه!!!!
- سهى؟؟ على فكره بكره الاسم ده طيب بصي عشان اقوم الحق اقرأ كلمتين بقا ..سلام
- شوفت يابابا
- ايه
- خلصت بسرعه
- يا فرحتي,,, شوفتي طلعت مش دينا
- معلش الاحتياط واجب هشيك بقا على ايميلي كده قبل ما ابدأ في الجد
- ايميييييييييييل ايييييييييييييييييييه؟؟
- الايميل بتاعي .. ايه السؤال الغريب ده
- انتي فاكره ان لسه قدامك وقت؟؟؟؟
- هيا الساعه كام؟
- اتناشر
- اله.. ايه اللي مسهرك لحد دلوقتي يابابا
- حضرتك
- انا ؟؟ ليه
- عشان تذاكري
- لا يابابا قوم.. اطمن انا هذاكر
- لا منا مطمن اوووووووووي
- معلش بقا يابابا .. هذاكر اهه.. خلاص مش هفتح ايميلي
- ينوبك ثواب ذاكري
- حاضر تصبح على خير
- وانتي من اهل الخير ربنا يوفقك ويعينك
- يارب
رجعت غرفتي وفي نيتي اذاكر..
بجد بجد لازم اخلص شوية لازم انجز بقا..
سؤال: كيف اثبت ابن رشد ان الفلسفه والمنطق غير محرمه شرعا؟
1-
2-
3-
حراااااااااام بقا كتير اووووووووووي ايه دددددددددددددددده
بيقولك اكل ونوم يديك دبلوم
ومااااااااااله الدبلووووووم
اهئ ..لاء انا وعدت بابا هدخل طب بالادبي

ويمر الوقت دون أن أنام.. طول الليل... طبعا النوم بيكون في اللجنه ..
على الاقل في امان شوية.. في مراقبات بيحرسوني من ان بابا بيصحيني
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://mariym.forumn.org
 
مقتطفات من مذكرات طالبة ثانويه عامه, فتاه مستهتره
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مـــرحيا بكـــم منتدى Ellol&Araby mazika :: شـــــبابــــيــات :: بلووووجز-
انتقل الى: